Հայ
Նոյեմբերի 15-ին կայացավ «Դիմակայենք կլիմայի փոփոխությանը» լրագրողական նյութերի մրցույթի եզրափակիչ փուլը: Ուսանողների և երիտասարդ մասնագետների համար նախատեսված մրցույթի նպատակն էր խթանել կլիմայի փոփոխության հարմարվողականության վերաբերյալ հանրային իրազեկման գործում լրագրողների և այլ ոլորտային մասնագետների մասնակցությունը՝ ուսանող/երիտասարդ մասնագետ-ԶԼՄ համագործակցության միջոցով ստեղծելով կլիմայի փոփոխության նկատմամբ առավել խոցելի ոլորտներին առնչվող հանրային իրազեկման բարձրացմանն ուղղված որակյալ լրահոս։ Մրցույթը կազմակերպվել էր «Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի շրջանակում Հանրային լրագրության ակումբի կողմից:
Մրցույթի եզրափակիչ անցած 10-ը լավագույն նախագծերի հեղինակները, մրցույթում ներգրավված պրոֆեսիոնալ մենթորների՝ Մարիամ Տաշչյանի, Գեղամ Վարդանյանի, Գևորգ Թոսունյանի, Լիլիթ Հովհաննիսյանի և Կարինե Ասատրյանի հետ համատեղ աշխատելով, իրենց նախագծերը վերջնականացնելու և այնուհետև հրապարակելու հնարավորություն էին ստացել:
Միջոցառման ընթացքում, եզրափակիչ անցած Սոնա Հովսեփյանը, Նունե Ավետիսյանը, Նարեկ Ալեքսանյանը, Կարինե Կազարովան, Արտեմ Ղազարյանը, Սերինե Սերոբյանը, Անգին Ծատուրյանը, Նատալյա Օսյանն ու Սոնա Խլոպուզյանը, Ադրինե Թորոսյանը, Լուսինե Գրիգորյանն առկա և առցանց ձևաչափով ներկայացրեցին գյուղատնտեսության, ջրային ռեսուրսների, բնական էկոհամակարգերի և զբոսաշրջության ոլորտներում կլիմայի փոփոխության ազդեցությունների և հարմարվողականությանն առնչվող ընտրված թեմաների շուրջ իրենց արդեն ավարտած և հրապարակած նախագծերը:
Քննարկման արդյունքում ժյուրիի գնահատականների հիման վրա մրցույթի հաղթող ճանաչվեցին և պարգևատրվեցին Նունե Ավետիսյանը, Կարինե Կազարովան և Ադրինե Թորոսյանը:
